തീരങ്ങളോരോന്നും തഴുകി ഒഴുകുന്ന ജീവിത നദി ഓരോ തീരങ്ങളിലിമെത്തുമ്പോള്‍ വെറുതെ കോറി പോവുന്ന തിര ലിഖിതങ്ങള്‍

Thursday, August 17, 2006

എന്റെ പക.

താരാട്ട് പാടിയെന്നെ നീ ഉറക്കിയില്ല,
തണുപ്പിന്റെ തലോടലേറ്റ് ഞാനുണരുമ്പോള്‍-
തലയില്‍ തലോടി കഥ പറഞ്ഞുറക്കിയില്ല.

കൈപിടിച്ചെന്നെ നീ നടത്തിയില്ല,
കല്ലില്‍ കാല്‍തട്ടി വീഴവെ, ഒരിക്കലും-
കൈപിടിച്ചുയര്‍ത്തി നീ നിര്‍ത്തിയില്ല.

ഉത്തരം കിട്ടാത്ത ചോദ്യങ്ങളു-
രുവാകുന്ന പ്രായത്തിലൊന്നും,
ഉണ്ടായിരുന്നില്ല നീയെന്റെ കൂടെ

കൊതിച്ചിരുന്നെന്നും ഞാന്‍,
കൊച്ചുകുട്ടിയായെന്നും നിന്റെ-
കൈപിടിച്ചറിയാത്ത വഴികള്‍ താണ്ടാന്‍.

ഇന്നു നീ യാത്ര പറയാതിറങ്ങവെ,
ഇനിയെന്തിനെന്‍ മനം നോവണ,മെന്തി-
നീറനണിയണമെന്‍ കണ്ണുകള്‍.

കാലിടറി വീഴുന്നു ഞാനിന്നും,
കളിക്കോലമായി മാറാന്‍ വിധിക്കവെ,
കണ്ണുനീരിലും പക നിറയുന്നു.

അടഞ്ഞ നിന്‍ മിഴികള്‍ കാണാന്‍ വരില്ല ഞാന്‍,
ആത്മാവിനാശ്വസിക്കാന്‍ കൈ തട്ടി വിളിക്കില്ല ഞാന്‍
അനാദികാലത്തോളം കാത്തിരിക്ക ഇനി നീയെനിക്കായി-
ആത്മം വെടിഞ്ഞ് ഞാനുമവിടെത്തും വരെയിനി.

-പാര്‍വതി.

6 comments:

ദിവ (diva) said...

ഇത് ഇഷ്ടപ്പെട്ടൂ പാര്‍വതീ...

കവിതയെപ്പറ്റിയൊന്നും അറിയില്ലെങ്കിലും ഇത് എന്തൊക്കെയോ ഓര്‍മ്മിപ്പിച്ചു.

ഗുണാളന്‍ said...

വളരേ നന്നായീ ..ഇത്രയും ഇന്റെന്‍സ്‌ ആയ ഒന്നും അടുത്ത കാലത്തു വായിച്ചതായീ ഓര്‍മയില്ല.ഓ മറന്നു..ഓര്‍മകള്‍ ഒരു ശാപമാണല്ലോ

മേരി വാനാ::Mary Vana said...

പാര്‍‌വതി നല്ല മനസ്സുള്ള ഒരു ബ്ലോഗ്ഗറാണ്‍. ഒരു നല്ല ബ്ലോഗറാണെന്നുവരെ ഞാന്‍ പറഞ്ഞുപോകും. പക്ഷേ ഇതുവരെ ഒരു നല്ല കവയത്രിയല്ല. അതൊരു കുറവുമല്ല. ഇനിയും എഴുതിക്കൊണ്ടിരിക്കുക. അതിനേക്കാളുപരി, ഒരുപാടുവായിക്കുക.

പാര്‍‌വതിയുടെ മനസ്സിലെ ആശയം നന്ന്. ആശയത്തെ കവിതയാക്കുന്ന കവികര്‍‌മ്മം ഒരു മഹാകര്‍‌മ്മം തന്നെയാണ്‍. എങ്ങനെയാണ്‍ ഇതിനു മുമ്പുവന്നവര്‍ അതു ചെയ്തതെന്നു നോക്കിപഠിച്ചുകഴിഞ്ഞാല്‍ പാര്‍‌വ്വതി കവയത്രി. അതു പഠിച്ചുകഴിഞ്ഞ് അവര്‍ ചെയ്തതിനോടു യാതൊരു സാമ്യവുമില്ലാതെ കവിതയെഴുതുമ്പോള്‍ പാര്‍‌വ്വതി മഹാകവയത്രി.

എനിക്കേറ്റവും ഇഷ്ടമുള്ള പേര്‍ പാര്‍‌വ്വതി എന്നായാതുകൊണ്ട് ഒരഭിപ്രായം പറഞ്ഞു എന്നുമാത്രം...

കൈത്തിരി said...

പകയാണോ, പകരം വീട്ടലാണോ...! അവസാന നാലു വരികള്‍ മനോഹരം...

ശാലിനി said...

നന്നായിട്ടുണ്ട്, ഉള്ളില്‍ ഒരു ചെറിയ നൊമ്പരം ഉണര്‍ത്തി. അവസാനത്തെ 4 വരികളിലാണ് പകരം വീട്ടല്‍.

Appukkuttan said...

കവിതയിലൊരു വിതയുണ്ടെന്നു
കുഞ്ഞുണ്ണീ മാഷു പറഞ്ഞുവച്ചതാണു.
ആ "വിത" പാര്‍വതീടെ രചനകളില്‍ കണ്ടു.

വിത മാത്രമായാല്‍ കവിതയ്ക്കു എന്തൊ പൊരായ്മ തൊന്നും.
വിമര്‍ശനങ്ങളെ ക്രിയാത്മകമായി സമീപിക്കുമല്ലോ !.

ഭാവുകങ്ങള്‍ പാര്‍വതീ..